Эрчим хүчний шилжилт, ногоон эрчим хүчийг нэмэгдүүлэх ажлын хүрээнд 10 МВт хүчин чадалтай нарны дулааны станцыг Дорноговь аймгийн төвд барих ТЭЗҮ-ийг хийж буй "Даян дэлхийн ногоон хөгжлийн институци"-тэй хамтран сургалт хэлэлцүүлэг зохион байгууллаа.
“Цэвэр дулаан хангамжийн хөрөнгө оруулалтыг нэмэгдүүлж эрчим хүчний шилжилтийг дэмжих” төслийн чадавхыг бэхжүүлэх сургалтыг Эрчим хүчний яам болон Даян Дэлхийн ногоон хөгжлийн институт (GGGI) хамтран 2025 оны 02 сарын 12-ны өдөр зохион байгуулав. Орон нутаг болон Улаанбаатар хотод үйл ажиллагаа явуулж буй эрчим хүчний салбарын төрийн өмчийн үйлдвэр компаниудаас 100 гаруй инженер техникийн ажилчид танхимаар болон цахимаар хамрагдав.
Монгол Улсад анх удаа хэрэгжих тус төслийн хүрээнд 25 сая долларын буцалтгүй тусламжаар Дорноговь аймгийн Сайншанд хотод 10 МВт-ын нарны дулааны эх үүсвэрийг 2025 – 2028 оны хооронд барьж байгуулах юм. Төслийн хүрээнд 45,000 иргэн цэвэр дулаан хангамжид холбогдож, 12,000 иргэн жилийн дөрвөн улиралд хэрэглээний халуун усыг цэвэр эх үүсвэрээс авах боломж бүрдэж байна.
Сургалтаар нарны хэсэгчилсэн дулааны станц байгуулах, ашиглах дотоодын чадавх, хүний нөөцийн мэдлэгийг дээшлүүлэх зорилгын хүрээнд нарнаас дулааны эрчим хүчийг үйлдвэрлэх технологийн харьцуулалтыг танилцуулан, Сайншанд хотын дулааны эх үүсвэр болох “Чандмань Илч” ХХК-ийн дэд бүтцийг ашиглан хэрхэн цэвэр дулааныг хэрэглэгчдэд хүргэх Техник Эдийн Засгийн Үндэслэлийг танилцуулав.
Сэтгэгдэл