“Хүлэмжийн хийн ялгарал багатай хэсэгчилсэн дулаан хангамжийн системийг Монгол Улсад хөгжүүлэх нь” төслийн нээлтийн семинар болов
Уур амьсгалын ногоон сангийн төслийн бэлэн байдлын санхүүжилтээр Эрчим хүчний яам болон НҮБ-ын Байгаль орчны хөтөлбөр (Уур амьсгалын ногоон сангийн итгэмжлэгдсэн)хамтран “Хүлэмжийн хийн ялгарал багатай хэсэгчилсэн дулаан хангамжийн системийг Монгол Улсад хөгжүүлэх нь” төсөл нь хувийн хэвшлийн оролцойтойгоор аймгийн төв болон Улаанбаатар хотын гэр хорооллыг алтернатив дулааны эх үүсвэрээр хангах замаар хүлэмжийн хийн ялгарал, агаарын бохирдлыг бууруулан Монгол Улсад эрчим хүчний үр ашигтай, хэсэгчилсэн дулаан хангамжийн системийг өргөжүүлэн хөгжүүлэхэд чиглэсэн бүрэн хэмжээний төслийн саналыг боловсруулах зорилготой.
Төслийн хүрээнд дараах үйл ажиллагааг хэрэгжүүлнэ. Үүнд:
- Дулаан хангамжийн системийн өнөөгийн төлөв байдал, сонгосон аймаг/хот/дүүрэг/хороо/гэр хорооллын дулаан хангамж, эрэлт, нийлүүлэлтийн судалгаа, дүн шинжилгээ
- Хувийн хэвшлийн хөрөнгө оруулалттай хэсэгчилсэн дулааны хангамжийн системийг хөгжүүлэх нөхцөл, боломж, бизнесийн загварыг тодорхойлох, үүнд: нүүрснээс бусад хүлэмжийн хийн ялгарал багатай алтернатив эх үүсвэрийг ашиглах боломжийг тодорхойлох /жишээ нь байгалийн хий, метан, газрын гүний дулаан, нарны эрчим хүч гэх мэт/, техник, эдийн засгийн үндэслэлийг боловсруулах
- Дулаан хангамжаас үүдэлтэй хүлэмжийн хийн ялгарлыг бууруулах дулаан хангамжийн системийг нэмэгдүүлэх хөрөнгө оруулалтын төсөл, үйл ажиллагааны төлөвлөгөөг боловсруулах зэрэг болно.
“Хүлэмжийн хийн ялгарал багатай хэсэгчилсэн дулаан хангамжийн системийг Монгол Улсад хөгжүүлэх нь” төслийн нээлтийн семинар өчигдөр /2018.08.21/ болсон. Семинарын үеэр Др. Судхир Шарма “Төслийн зорилго, зорилт, үйл ажиллагаа ба хүрэх үр дүн”, төслийн ажилтан С.Алтанцэцэг “Төслийг хэрэгжүүлэх механизм”, төслийн үндэсний зөвлөх /ШУТИС-ийн багш/ профессор Б.Намхайням “Улаанбаатар хот, аймгийн төвийн дулаан хангамжийн төлөв байдал, дэвшилтэт технологи нэвтрүүлэх боломж, шийдэл” зэрэг сэдвээр илтгэл тавьсан. Үүний дараагаар нээлттэй хэлэлцүүлэг өрнөж, салбарын инженер, албан байгууллага, аж ахуйн нэгжүүдийн санал бодлыг сонсож, оновчтой гэснийг нь цаашдын үйл ажиллагааныхаа хөтөлбөрт тусгахаар болсон юм.
Сэтгэгдэл